२५ भदौ, काठमाडौं - थाइल्यान्डको फुकेटमा शुक्रबार सम्पन्न ४५ औं पुरुष र २६ औं महिला एसियाली भारोत्तोलन च्याम्पियनसिपमा तीन नेपाली खेलाडील...
२५ भदौ, काठमाडौं - थाइल्यान्डको फुकेटमा शुक्रबार सम्पन्न ४५ औं पुरुष र २६ औं महिला एसियाली भारोत्तोलन च्याम्पियनसिपमा तीन नेपाली खेलाडीले पाँच राष्ट्रिय कीर्तिमान बनाएका छन् ।
तारादेवी पुनले महिलाको ७५ केजीमाथि स्न्याच, क्लिन एन्ड जर्क र कुल गरी तीन कीर्तिमान बनाइन् । उनले स्न्याचमा स्न्याच ७१ केजी, क्लिन एन्ड जर्कमा ९५ केजी गरी कुल १ सय ६६ केजी उठाएर आफ्नै कीर्तिमान तोडेकी हुन् । उनले चैत, २०७१ मा सातदोबाटोमा भएको चौथो ग्राँ प्रि भरोत्तोलनमा बनाएकी कीर्तिमानलाई स्न्याचमा ३, क्लिन एन्ड जर्कमा १ गरी कुल ४ केजी बढी भार उठाउँदै फुकेटमा सुधार गरेकी हुन् ।
ताराले झन्ट कटवाल बिदेशिएपछि सबभन्दा बलियी नेपाली महिलाको पहिचान बनाएकी छिन् । उनले प्रत्येक प्रतियोगितामा राष्ट्रिय कीर्तिमान बनाउँदै आएकी छिन् ।
पुरुषतर्फ गगनसिंह ओली र पुकार गुरुङले पनि एक–एक कीर्तिमान बनाएको नेपाल भारोत्तोलन संघका सचिव सञ्जय महर्जनले जानकारी दिए ।
गगनसिंहले १ सय ५ केजी स्पर्धामा स्न्याचतर्फ १ सय १३ केजी उचाल्दै १६ वर्ष पुरानो मदन शिवभक्तिको कीर्तिमान भंग गरेका हुन् । मदनले सन् १९९९ मा काठमाडौंमा आयोजित आठौं दक्षिण एसियाली खेलकुदमा १ सय १२ केजी उठाएका थिए । गगनसिंहले क्लिन एन्ड जर्क र कुल तौलमा मदनका कीर्तिमान भने तोड्न सकेनन् । उनले क्लिन एन्ड जर्कमा १ सय ३७ केजीसहित कुल २ सय ५० केजी चार उठाए ।
त्यस्तै, पुकारले १ सय ५ केजीमाथि १ सय २३ केजी उठाएर राष्ट्रिय कीतिृमान बनाएका हुन् । उनले ११ वर्षअघि इस्लामावादमा भएको नवौं दक्षिण एसियाली खेलकुदमा गोपालबहादुर श्रेष्ठले १ सय २२ केजी उचाल्दै बनाएको कीर्तिमान तोडेका हुन् । उनले क्लिन एन्ड जर्क र कुलको कीर्तिमान भने आफ्नो बनाउन सकेनन् । उनले क्लिन एन्ड जर्कमा १ सय ४२ केजीसहित कुल २ सय ६५ केजी भार उठाए ।
यसपल्टको एसियाली भारोत्तोलनमा सहभागी ६ खेलाडीमध्ये यसअघि बिहीबार पुरुषको ९४ केजीमा दिनेश श्रेष्ठले पनि कीर्तिमान बनाएका थिए । उनले स्न्याचतर्फ १ सय १५ केजी उचाल्दै आफ्नै नाममा रहेको कीर्तिमानमा २ केजीले सुधार गरेका थिए ।
