एएफसी यू–१६ छनोट: युवा फुटबल टिमको ठूलो लक्ष्य

२६ भदौ, काठमाडौं - युवा टिमका लागि लक्ष्य पहाड जस्तै विशाल छ । तर बुधबारदेखि किर्गिस्तानमा सुरु हुने एएफसी यू–१६ छनोट चरण पार गर्ने नेपा...

२६ भदौ, काठमाडौं - युवा टिमका लागि लक्ष्य पहाड जस्तै विशाल छ । तर बुधबारदेखि किर्गिस्तानमा सुरु हुने एएफसी यू–१६ छनोट चरण पार गर्ने नेपालको लक्ष्य छ । लगातार दोस्रोपटक एएफसी यू–१६ च्याम्पियनसिप खेल्दै उमेर समूहमा फेरि आफ्नो प्रभाव देखाउने प्रयासमा छ नेपाल ।

 

२ वर्षअघि नेपालले विमल घर्तीमगरको कप्तानीमा काठमाडौंमा भएको छनोट चरण पार गरेको थियो र गत वर्ष थाइल्यान्डमा च्याम्पियनसिपमा खेलेको थियो । वर्तमान यू–१६ टिम अहिले त्यसैलाई निरन्तरता दिने प्रयासमा छ । तर नेपालका लागि चुनौती सजिलो छैन । यसअघि तीन पटक छनोट पार गर्दा नेपालले सबै घरेलु मैदानमा खेलेको थियो ।

यसको मतलब वर्तमान नेपाली टिमसँग पहिलोपटक विदेशी भूमिमा एएफसी यू–१६ छनोट चरण पार गर्नुपर्ने चुनौती छ । किर्गिस्तानमा नेपालले घरेलु टोलीसँगै जोर्डन र ओमानसँग खेल्नेछ । सन् २०११ मा ओमानले यसै प्रतियोगिताको छनोट चरणमा नेपाललाई २–० ले पराजित गरेको थियो । अन्य दुई टिम नेपालका लागि नयाँ जस्तै छन् ।

नेपालका प्रशिक्षक उपेन्द्रमान सिंह उमेर समूहको प्रतियोगिता भएकाले यस्ता तथ्यमा खासै ध्यान दिंदैनन् । ‘हाम्रा लागि चुनौती सजिलो पनि छ, गाह्रो पनि छ । उमेर समूहमा हामी पनि राम्रो छौं, त्यो सकारात्मक पक्ष हो,’ नेपाली राष्ट्रिय टिमका पूर्वकप्तान सिंहले भने, ‘गाह्रो भनेका सबै टिम बराबर हुन्छन् ।’ सिंह र राजेश मानन्धर मिलेर नेपाली यू–१६ टिम सम्हालिरहेका छन् । मुख्य प्रशिक्षकको भूमिकामा सिंहले यही यू–१६ टिमदेखि हेर्न लागेका हुन् । उनकै प्रशिक्षणमा नेपाली यू–१६ टिम एक वर्षदेखि फक्रिरहेको छ । ‘हामी एक वर्षदेखि नियमित जस्तो प्रशिक्षण गरिरहेका छौं, मुख्य विशेषता भनेको यही हो । अभ्यास पनि राम्रो भइरहेको छ,’ उनले भने ।

मनाङ–मस्र्याङदी क्लब, नेपाल एपीएफ क्लब र आर्मीका गणहरूसँग अभ्यास खेल खेलेर नेपालले किर्गिस्तानको तयारी गरेको थियो । नतिजा आफू अनुकूल नआए पनि सिंह यसलाई राम्रो तयारी मान्छन् । यसैलाई आधार बनाएर उनी नेपाललाई छनोट गराउने आधार बनाउँछन् । गत महिना नेपालले बंगलादेशमा साफ यू–१६ च्याम्पियनसिपमा खेलेको थियो । समूह चरणमा माल्दिभ्सलाई ५–० र अफगानिस्तानलाई १–० ले पराजित गरेको थियो । सेमिफाइनलमा नेपाल भने पुरानै प्रतिद्वन्द्वी भारतसँग १–० ले पराजित भएको थियो ।

सिंह साफ यू–१६ च्याम्पियनसिपले नै नेपाली खेलाडीलाई ‘एक्सपोज’ गराएको मान्छन् । २०१३ मा काठमाडौंमा नेपाल छनोट हुँदा ८ गोल गरेको थियो । ‘फ्रि स्कोरिङ’ छनोट चरणमा विमल एक्लैले चार गोल गरेका थिए । साफ च्याम्पियनसिमा स्ट्राइकर प्रेजेन तामाङले २ गोल गरे पनि नेपाली टिममा स्ट्राइकरकै कमी देखिएको छ । तर सिंह भन्छन्, ‘हाम्रो समस्या अलिकति रक्षापंक्तिमै छ ।’

 

नेपाली टिम:

गोलरक्षक : अर्पण कार्की, सन्देश गुरुङ, उज्ज्वल लिम्बू

रक्षापंक्ति : रोमन लिम्बू, लक्ष्मण परियार, पवन कार्की, अनोस मगर, सुमन अर्याल,
                  आशिष केसी, असिम भुसाल, अभिषेक बर्मा

मध्यपंक्ति : अभिषेक रिजाल, मनीष कार्की (कप्तान), सेसेहाङ आङदम्बे, अनिल महर्जन, अशोक थापा, जय गुरुङ

अग्रपंक्ति : राजीव लोप्चान, रेजिन सुब्बा, दिनेश हेन्जन, प्रेजेन तामाङ, राजेश परियार, क्षितिजराज जीटी

अफिसियल : उपेन्द्रमान सिंह (मुख्य प्रशिक्षक), राजेश मानन्धर (प्रशिक्षक), मधुसूदन उपाध्याय (व्यवस्थापक) ।

 

नेपालका खेलहरू
भदौ ३०– विरुद्ध जोर्डन
असोज १ विरुद्ध किर्गिस्तान
असोज ३ विरुद्ध ओमन