२३ भदौ, काठमाडौं - थोमस मुलर र केली लाफेर्टीको खेल जीवन फरक दिशामा रहेको छ । तर यिनै दुई खेलाडीले निकालेको महत्त्वपूर्ण गोलको मद्दतले जर...
२३ भदौ, काठमाडौं - थोमस मुलर र केली लाफेर्टीको खेल जीवन फरक दिशामा रहेको छ । तर यिनै दुई खेलाडीले निकालेको महत्त्वपूर्ण गोलको मद्दतले जर्मनीसँगै उत्तरी आयरल्यान्ड सोमबार राति सन् २०१६ को युरो छनोटको नजिकको दूरीमा पुगेका छन् । विश्वकप र युरोपेली च्याम्पियन्स लिग विजेता मुलरको दुई गोलमा जर्मनीले स्कटल्यान्डलाई ३–२ ले हरायो ।
हारले स्कटलयान्डको छनोट सम्भावना कमजोर भएको छ । अब उसले प्ले–अफ खेल्ने तेस्रो स्थान हात पार्न पनि संघर्ष गर्नुपर्नेछ । इंग्लिस प्रिमियर लिग क्लब नरविचका लागि सुरुआती टिममा पर्न नसकिरहेका लाफेर्टीले उत्तरी आयरल्यान्डका लागि इन्ज्युरी समयमा गोल गरे र टिमले हंगेरीविरुद्ध १–१ को बराबरी निकाल्यो । यसले टिम आफ्नो समूहमा शीर्ष स्थानमा रह्यो ।
उत्तरी आयरल्यान्ड रोमानियासँगै समान अंकमा छ । दुई चरणको खेल बाँकी रहेको बेला उसलाई हंगेरीमाथि चार अंकको ठोस अग्रता प्राप्त छ । अब अर्को खेलमा उत्तरी आयरल्यान्डले समूहको पुछारमा रहेर कमजोर बनेको ग्रिसमाथि जित प्राप्त गर्न सके त्यो युरो छनोटका लागि पर्याप्त हुनेछ । यस्तोमा उत्तरी आयरल्यान्ड सन् १९८६ को विश्वकपपछि पहिलोपल्ट ठूलो प्रतियोगितामा छनोट हुनेछ ।
पोर्चुगल पनि फ्रान्समा हुने प्रतियोगिताको छनोट नजिक पुगेको छ । उसले म्यागुएल भेलोसोले खेलको अन्त्यतिर गरेको गोलमा अल्बानियालाई १–० ले हरायो र आफ्नो समूहको शीर्ष स्थानमा रह्यो । पोर्चुगल तेस्रो स्थानमा रहेको अल्बानियाभन्दा चार अंकले अगाडि छ र यस समूहमा पनि दुई चरणका खेल मात्र बाँकी रहेका छन् । विश्व विजेता जर्मनीले भने जितसँगै लगातार राम्रो प्रदर्शनको कीर्तिमान पनि बनाएको छ ।
जर्मनी पछिल्ला ७१ खेलमा पहिलोपल्ट गोल गरेर अहिलेसम्म पराजित हुनुपरेको छैन । जर्मन प्रशिक्षक जोचिम लोले जर्मनी स्कटल्यान्डविरुद्ध तीन अंकका लागि पूरा हकदार रहेको दाबी गरे । उनले भने, ‘आजको खेलमा हामीले पूर्णत: पकड कायम राख्यौं । त्यसैले हामी जितका हकदार छौं । हाम्रा खेलाडीले जसरी खेलिरहेका छन्, त्यसमा मलाई गर्व छ ।’
त्यसका ठीक विपरीत स्कटिस प्रशिक्षक ग्रोडेन स्ट्रचनका लागि भने अप्ठ्यारो समय निर्माण भएको छ । तर पनि हारमा उनले आफ्ना खेलाडीको प्रशंसा गर्न भने बिर्सेनन् । ‘स्थिति प्रतिकूल रहे पनि हाम्रा खेलाडीले जसरी खेले, त्यसमा प्रशंसाका शब्द खर्चिन कन्जुस्याइँ गर्न मिल्दैन ।
उत्तरी आयरल्यान्डका लागि भने हंगेरीले पहिला गोल गरे पनि स्थिति प्रतिकूल देखिएको थियो । तर लाफेर्टीले ठीक समयमा छनोटका लागि निर्णायक सावित हुन गोल निकाले ।
‘अब छनोटमा हाम्रा लागि दुई खेल बाँकी छ र हामीले त्यसमध्ये एकमा जित निकाल्नुपर्नेछ । हामी अन्त्यसम्म पनि कडा मिहिनेत गर्न तयार छौं र आफ्ना समर्थकलाई खुसी दिन चाहन्छौं,’ लाफेर्टीले भने, ‘यो टिमले मिहिनेत गर्ने काम रोक्न जानेको छैन र हामी छनोटका लागि प्रतिबद्ध छौं ।’
